ஸ்ரீவில்லிபுத்தூர் அருகேயுள்ள மம்சாபுரம், காந்திநகர்-இந்திராநகர் காலனியைச் சேர்ந்தவர் முருகானந்தம்-அலமேலு தம்பதியினரின் மகன்
அருண்குமார் (10). இவரது தந்தை இறந்துவிட்டார். தாய் கூலி வேலை செய்து மகனையும் ஒரு மகளையும் படிக்க வைத்து வருகிறார். அருண்குமார் நரையன்குளம் ஒத்தப்பட்டி ஊராட்சி ஒன்றிய நடுநிலைப் பள்ளியில் 5-ம் வகுப்பு படித்து வருகிறார். இவரது ஊரைச் சேர்ந்தவர் அய்யனார்-பாக்கியம் மகன் அய்யனார் (9). இவர் இதே பள்ளியில் 4-ம் வகுப்பு படித்து வருகிறார்.
ஞாயிற்றுக்கிழமை கிராமத்திற்கு மேற்கேயுள்ள செண்பகத்தோப்பை ஒட்டியுள்ள ராக்காச்சியம்மன்கோயிலுக்கு ஊரில் உள்ளவர்களுடன் இரு மாணவர்களும் சென்றுள்ளனர். அங்கு மலையில் இருந்து தண்ணீர் அருவிபோல் விழும். மேலும் தண்ணீர் 15 அடிக்கு மேல் ஒரு இடத்தில் தேங்கி நிற்கும். ஊர் பெரியவர்கள் பின்னால் வந்துள்ளார்கள். மாணவர்கள் இருவரும் நீர் உள்ள இடத்திற்குச் சென்றுள்ளனர். நீச்சல் தெரியாத அய்யனார், ஆழம் குறைவாக இருக்கும் என்று நினைத்து தண்ணீர் இறங்கியுள்ளார். படிப்படியாக ஆழமுள்ள பகுதிக்கு அய்யனார் செல்லவே மூச்சு திணறல் ஏற்பட்டு மூழ்கும் நிலையில் கையை மட்டும் உயர்த்தியுள்ளார்.
இதனை புரிந்து கொண்ட அருண்குமார் நீரினுள் குதித்து, அய்யனாரின் முடியைப்பிடித்து இழுத்து கரைக்கு கொண்டுவந்துள்ளார். அருண்குமாரின் செயலை உடன் வந்த பெரியவர்கள் பாராட்டினர். மேலும் மாணவரின் இந்த வீர தீர செயல் திங்கள்கிழமை பள்ளிக்குத் தெரிய வரவே அவரை தலைமை ஆசிரியை இ.ஜெஸிந்தா மற்றும் ஆசிரியர்கள் பாராட்டி பரிசு வழங்கினர்.
