தமிழக சட்டசபை கூட்டத்தொடர் முடித்து வைப்பு கவர்னர் உத்தரவு!!

சென்னை, தமிழகத்தில் அ.தி.மு.க.வின் புதிய ஆட்சி அமைந்த நிலையில் சட்டசபையின் முதல் கூட்டத்தொடர் 25.5.16 அன்று தொடங்கியது. சட்டசபை தேர்தலில் வெற்றிபெற்ற வேட்பாளர்கள், அன்று எம்.எல்.ஏ.யாக பதவி ஏற்றனர்.அதன் பின்னர் கடந்த ஜூன் 3-ந் தேதியன்று சபாநாயகர் தேர்தல் நடைபெற்றது. சபாநாயகராக ப.தனபால் தேர்வு
செய்யப்பட்டார். அதைத் தொடர்ந்து ஜூன் 17-ந் தேதி சட்டசபையில் கவர்னர் உரை நிகழ்த்தினார்.கவர்னர் உரைக்கு நன்றி தெரிவிக்கும் தீர்மானத்தின் மீது எம்.எல்.ஏ.க்கள் விவாதித்தனர். அந்தத் தீர்மானத்தின் மீது வாக்கெடுப்பு உள்ளிட்ட நிகழ்வுகள் ஜூன் 23-ந் தேதி வரை நடைபெற்றது.தமிழக அரசின் பட்ஜெட் ஜூலை 21-ந் தேதியன்று சட்டசபையில் தாக்கல் செய்யப்பட்டது. பின்னர் அரசுத் துறைகளின் மானியக் கோரிக்கைகள் மீது விவாதமும், வாக்கெடுப்பும் நடத்தப்பட்ட அந்தத் துறைகளுக்கான நிதி ஒதுக்கப்பட்டது.சட்டசபை நிகழ்வுகள் ஆகஸ்டு 16-ந் தேதியன்று முடிந்த நிலையில், கூட்டத்தொடர் தேதி குறிப்பிடப்படாமல் தள்ளி வைக்கப்பட்டது. இந்த நிலையில், தமிழ்நாடு சட்டசபையின் செயலாளர் அ.மு.பி.ஜமாலுதீன் நேற்று வெளியிட்டுள்ள அறிவிப்பில் கூறப்பட்டு இருப்பதாவது:-கடந்த 25.5.16 அன்று சட்டசபையின் முதலாவது கூட்டத்தொடர் தொடங்கியது. இந்த கூட்டத்தொடரை இந்திய அரசியல் சாசனத்தின் 174(2) (ஏ) ஷரத்தின்படி, தமிழக கவர்னர் இறுதி செய்து உத்தரவு பிறப்பித்துள்ளார்.இவ்வாறு அதில் கூறப்பட்டுள்ளது