சென்னை உயர் நீதிமன்ற நீதிபதிகள் பரிந்துரைப் பட்டியல்

சென்னை உயர் நீதிமன்றத்தில் காலியாக உள்ள நீதிபதி பணியிடங்களை நிரப்புவதற்காக உச்ச நீதிமன்ற நீதிபதிகள் தேர்வுக் குழுவுக்கு சென்னை உயர் நீதிமன்றத் தலைமை நீதிபதி எஸ்.கே. கௌல் 9 பேர் அடங்கிய பெயர்ப் பட்டியலைப் பரிந்துரை செய்துள்ளார்.


கடந்த மாதத்தின் முதல் வாரத்தில் பரிந்துரை செய்யப்பட்ட இந்தப் பட்டியலில், என்.எல்.ராஜா (52), எல்.சந்திரகுமார் (54), டி.கிருஷ்ணகுமார் (52), எஸ்.எஸ்.சுந்தர் (52), பாரதிதாசன் (51), எம்.வி.முரளிதரன் (52), பி.கலையரசன் (59), என்.ஆதிநாதன் (56), கோகுல்தாஸ் (60) ஆகியோர் இடம்பெற்றுள்ளனர்.



1. என்.எல்.ராஜா: தற்போது பாரம்பரியக் கட்டடக் குழுவின் உறுப்பினராக உள்ளார். திருச்சியில் தனது வழக்குரைஞர் பணியைத் தொடங்கி, இப்போது சென்னை உயர் நீதிமன்றத்தில் பணியாற்றி வருகிறார். கடந்த 30 ஆண்டுகளாக வழக்குரைஞர் பணியில் ஈடுபட்டு வருகிறார்.

2. எல்.சந்திரசேகர்: அரசுப் பணிகள் தொடர்பான வழக்குகளில் சிறப்பாக வாதாடக் கூடியவர். பெரும்பாலும் மத்திய நிர்வாகத் தீர்ப்பாய, மாநில நிர்வாகத் தீர்ப்பாய வழக்குகளில் ஆஜராகி வருகிறார். இவரும் 30 ஆண்டுகளுக்கு மேல் வழக்குரைஞராகப் பணியாற்றுகிறார்.

3. கிருஷ்ணகுமார்: சென்னை உயர் நீதிமன்றத்தில் இப்போது சிறப்பு அரசு வழக்குரைஞராக உள்ளார். இவரும் 30 ஆண்டுகளுக்கு மேல் வழக்குரைஞராகப் பணியாற்றுகிறார்.

4. எஸ்.எஸ்.சுந்தர்: இப்போது மதுரை உயர் நீதிமன்றத்தில் வழக்குரைஞராக உள்ளார். இவருக்கு 25 ஆண்டுகள் வழக்குரைஞர் அனுபவம் உள்ளது.

5. பாரதிதாசன்: உயர் நீதிமன்றத்தில் சென்னை மாநகராட்சி வழக்குரைஞராக இப்போது உள்ளார். 25 ஆண்டுகளுக்கு மேல் வழக்குரைஞராகப் பணியாற்றி வருகிறார்.

6. எம்.வி.முரளிதரன்: சென்னை உயர் நீதிமன்றத்தில் 25 ஆண்டுகளாக வழக்குரைஞராகப் பணியாற்றி வருகிறார்.

7. பி.கலையரசன்: சென்னை உயர் நீதிமன்றப் பதிவாளர் ஜெனரலாக உள்ளார். இதற்கு முன்பு பல்வேறு பொறுப்புகளிலும், சென்னை முதன்மை அமர்வு நீதிமன்ற நீதிபதியாகவும் பணியாற்றியுள்ளார்.

8. என்.ஆதிநாதன்: சென்னையில் உள்ள முதன்மை அமர்வு நீதிமன்ற நீதிபதியாக உள்ளார்.

9. கோகுல்தாஸ்: மதுரை மாவட்ட நீதிபதியாகப் பணியாற்றி வருகிறார்.