வதோதரா,
குஜராத் மாநிலம் வதோதரா நகரின் பரன்பூர் பகுதியில் பாரதி பள்ளி உள்ளது. இந்த பள்ளியில் 9-ம் வகுப்பு படித்து வந்த தேவ் தட்வி என்ற மாணவர் நேற்று முன்தினம் பள்ளி கழிவறையில் வைத்து கத்தியால் குத்திக்கொலை செய்யப்பட்டார். அவரது உடலில் சுமார் 30 இடங்களில் கத்திக்குத்து காயம் இருந்தது.
இந்த சம்பவம் குறித்து போலீசார் விசாரணை நடத்தியதில், 10-ம் வகுப்பு மாணவர் ஒருவர்தான், தேவ் தட்வியை கொலை செய்தது தெரியவந்தது. இதைத்தொடர்ந்து நேற்று அந்த மாணவரை போலீசார் கைது செய்தனர். பள்ளிக்கு அவப்பெயரை ஏற்படுத்தவே இந்த கொலையை அவர் நிகழ்த்தியதாக போலீசாரிடம் அவர் கூறியதாக தெரிகிறது.
அதாவது வீட்டுப்பாடம் எழுதாததால், 10-ம் வகுப்பு மாணவரை ஆசிரியர் கண்டித்துள்ளார். இதனால் ஆத்திரம் அடைந்த அந்த மாணவர், பள்ளிக்கு எப்படியாவது அவப்பெயர் ஏற்படுத்த வேண்டும் என திட்டமிட்டு உள்ளார். இதற்காக மாணவர் ஒருவரை கொலை செய்ய எண்ணிய அவர், தேவ் தட்வியின் உயிரை பறித்து இருப்பதாக போலீசார் தெரிவித்தனர்.
